近年潮流興食素，話對健康同皮膚好啲之外，仲有助減肥，但亦有健身愛好者話食素會冇力，究竟真定假？為咗想體驗食素對身心嘅改變，我剛剛嘗試食咗 30 日素。
食法食素都有唔方法：有人會唔食肉但照蛋奶 and/or 五辛（即蔥、蒜之類），亦有人會食全素（蛋類、奶類製品及任何同動物有關嘅都唔食），而我嘅方法係較寬鬆嘅「碟邊素」，我會避開唔食肉，但以肉類製成嘅汁或湯、豬油製成嘅糕餅我都會照食。雖然我有食蛋同奶，但唔會特別食好多嚟補充蛋白質，亦冇食任何補充劑，如「大隻奶粉」。
平日飲食早餐通常都係喺屋企食，會食麵、菜、花生醬多士，或者 Oatmeal Square（小麥方塊，無添加糖）加奶。由於工作關係，午餐及晚餐通常都喺街食，有時會喺茶餐廳叫素菜類嘅客飯、上海鋪嘅素餃麵，亦會去壽司店食蛋壽司、粟米軍艦等。小食方面，會食果仁或者雞蛋三文治。其實而家食素係比我預期中更方便。
去飲、團年飯呢 30 日裡面，飲過一餐喜酒及一餐團年飯。為咗唔想添麻煩，我並無要求一啲素食嘅菜式，只係見到啱嘅就食。除咗雙輝美點同生果，其實真係冇乜嘢可以食，就算有菜，都十分多油...
身心轉變食素第一個星期，有學生覺得我塊面瘦咗，而身型係細件咗。
去到第 13 日，照鏡時開始覺得肌肉比之前細咗，尤其是膊頭及手臂肌肉。
去到大概第 20 日，開始覺得做 Gym嘅力量比之前差咗，例如升體上升次數少咗，舉嘅重量輕咗；而做 Gym 嘅意慾亦冇之前咁高。練體操時，打空翻亦比之前辛苦咗。體型方面，雖然肌肉細咗，但腹部嘅脂肪反而多咗。
其他皮膚有冇好啲？冇，不過我皮膚一向都 Okay。
脾氣有冇好到，心情會唔會平和啲？一樣，同平時冇乜分別。
去廁所容易 / 辛苦咗？多 / 少咗？冇分別。
會唔會好易肚餓？又唔會喎。
結論冇。每個人嘅體質都唔同，食素亦有好多方法，加上我只係食咗一個月咁大把，我唔想隨便為食素下定論，如「食素有礙健身/運動」。如果大家對素食有興趣，或者想知道對運動嘅影響，唔好剩係睇書睇理論，不妨自己親身試吓。
嚟緊呢 30 日，我會多食肉類及蔬菜而少食五穀類，再睇吓身型有乜嘢轉變。遲啲再同大家報告。
---------------------------------------------------------------------------------------------------------------
單人 / 小組健身課程 | 於私人健身室舉辦，有不同日子及類型課堂任你揀。
詳程請登入：
http://simplefitness123.blogspot.hk/2000/01/group-training.html（圖片來源：
http://www.hercampus.com/school/american/questions-you-shouldnt-ask-vegetarian）
