成日俾人問「要做幾耐先減到肚腩？」「要練幾耐先瘦到大髀手臂？」。呢啲問題，仲難答過問風水佬自己幾時會發達。
就算有兩個人一齊做 Gym，做嘅動作、次數、重量一樣，得出嚟嘅結果都可以好唔同。健身減肥嘅進度要視乎好多因素，例如：
飲食 – 一個十分關鍵嘅因素，但唔少人都忽略咗佢。就算你好勤力做運動，但平時「食七咁食」，咁樣都係於事無補。「唔想戒零食，平時跑返多啲步得唔得？」條數並唔係咁簡單，想 Fit 係要運動、飲食兩者配合先得。
本身嘅身型 – 一個好肥、冇做開運動嘅人減肥，開始時嘅進度一定好快：磅數跌得快、身型亦好易見到有分別；但一個平時已經做開運動、身型已屬中上嘅人想再進一步，當然要花多好多功夫。
年紀 – 通常年紀越輕，減肥越快，但都唔代表年紀大嘅人減唔到肥，只要花多啲心機就得。
性別 – 由於男女賀爾蒙有別，通常男性減肥進度會較快。
運動底子 – 依我嘅經驗，之前有運動底子嘅人，例如細個係泳隊、之前練過瑜伽，學習健身會較易上手。
其實仲有其他因素，遺傳、生活習慣、壓力、睡眠、性格等都有影響，恕我不能盡錄。所以每次有人問我，我都會話答佢唔到。並唔係懶惰，而係唔想亂噏一個答案，令人對健身有錯誤嘅期望。
---------------------------------------------------------------------------------------------------------------
單人 / 小組健身課程 | 於私人健身室舉辦，有不同日子及類型課堂任你揀。
詳程請登入：http://simplefitness123.blogspot.hk/2000/01/group-training.html
