早幾日有位網友喺我 Facebook 留言，問做 Gym 放低器材時可否輕力啲。是咁的… 有篇報導話《求愛大作戰》入面位大隻仔Rocky 做 Deadlift 時被指 Barbell 撞擊地面嘅聲音太噪，被要求用瑜伽墊墊住，又話佢呼吸聲太誇張騷擾他人，總之就乞人憎咁話。
呢篇嘢並唔係要維護定插佢，因為當時我唔在場，況且大聲與否實在係好主觀，正如健身室嘅冷氣一樣，不論任何時候都會有人覺得太凍或太熱。我只係想討論吓健身室入面嘅聲音問題。
首先講吓器材嘅撞擊聲。健身器材，如啞鈴、槓鈴、壺鈴、鐵餅，都係以金屬製造，縱使外層可能有膠包住，舉重區地面亦以吸震嘅材料造成，正常使用下亦難免會有聲響；而某些動作，如啞鈴卧推舉（Dumbbell Chest Press）或硬拉（Deadlift），如負重有返咁上下，的確係難以輕放返喺地下，仲要冇聲。
之後就係講呼吸聲。舉重同平時唔同，係用緊力去做某啲動作，呼吸比平時太聲實在正常。而有時啲人喺出力時嗌出聲，亦係出於自然，正如喺日常生活搬重嘢時都可能會「唏」一聲嗌出嚟，原來嗌出聲係會增強運動表現，會大力啲，本人早前已寫過一篇文章解釋：http://simplefitness123.blogspot.hk/2014/11/gym_28.html 。
可能有人會話「練輕啲咪唔噪囉」或者「冇力就唔好做咁重啦」，呢兩點我係唔贊同嘅。我認為每個人都有自由選擇練輕定練重，如果人地係以正當技巧做動作而發出聲音，實在係無可厚非，而發出沉重呼吸聲或較大撞擊聲亦唔代表冇力。
當然，我亦見過唔少人係突登將器材大力扔到地面，或者無故大聲呻吟，咁樣梗係另作別論。
---------------------------------------------------------------------------------------------------------------
單人 / 小組健身課程 | 於私人健身室舉辦，有不同日子及類型課堂任你揀。
詳程請登入：http://simplefitness123.blogspot.hk/2000/01/group-training.html
