「健身時，邊個方法會比較好：同一個動作，做 3 至 4 組後再做另一個；還是一次過完成三四個不同動作，再做第二、第三 Round？」
驚有人唔明，我嘗試再寫簡單啲：
假設今日我想練四個動作，掌上壓、Sit Up、練拜拜肉、蹲腿，計劃每個動作各做 3 組，每組 10 次。
方法 A：做完 10 次掌上壓，接住落就做 Sit Up 10 次，再做拜拜肉、蹲腿各 10 次，為之一組。休息之後再重複多兩組。
方法 B：掌上壓做晒 3 組先，之後做 Sit Up 3 組，如此類推。
方法 A 即係「循環訓練」。好處包括：
1. 慳時間。通常每個動作之間只有數十秒甚至沒有休息時間，可以喺短時間入面做較多動作。
2. 同時訓練多個部位。通常每個循環訓練流程編排都包含鍛練身體各個部位嘅動作，對於生活較繁忙，每星期只可做一、兩次 Gym嘅朋友，循環訓練就能夠給與「一次過練晒全身」嘅感覺。
3. 氣氛較好。如果係小組循環訓練，例如大型健身連鎖店嘅 Group Class，係幾開心嘅。
需要留意嘅地方：
1. 如選擇循環訓練方法，建議選擇較簡單嘅動作，如利用身體重量蹆腿、訓練腹肌嘅 Floor Exercise 等
2. 訓練重量需調輕。假如獨立訓練蹲腿時，最佳記錄能夠負重 100 磅做 10 次，循環訓練時就算做相同次數，最多只能負重七、八十磅。
方法 B，我搵唔到一個正式嘅名，只能夠叫佢做「逐個動作分開嚟練」。好處包括：
1. 適合訓練較複雜動作，如 Deadlift、負重嘅蹲腿、Bench Press等。每次只做一個動作，專注力較高，能夠較集中注意力喺訓練部位，例如需要何時收緊哪個肌肉、身體姿勢要如何、幅度有幾大等。
2. 能夠集中訓練某部位。例如今日我想集中訓練胸肌，我會先做強度較高嘅 Bench Press 或 Inclined Press，再做 Dumbbell或Cable Chest Fly，最後以雙槓嘅 Dip Exercise 作結。但以上幾個動作以循環訓練方式去做，係行唔通嘅，又或者，全部重量要大幅調低。
3. 能夠應付較高重量。由於每組之間有充份休息，令肌肉得以回復，所以能夠舉得更重。
4. 訓練較仔細。每組動作嘅重量、次數、休息時間、幅度都可以按情況調節。
結論：我認為兩個方法都可以同時使用，例如先用「逐個動作分開嚟練」方法訓練數個動作，最後挑選幾個較簡單動作，以「循環訓練」作結。但如果真係要二擇一，我會認為「逐個動作分開嚟練」較有效，不論你嘅目標係減肥、增強力量、增加肌肉。
---------------------------------------------------------------------------------------------------------------
單人 / 小組健身課程 | 於私人健身室舉辦，有不同日子及類型課堂任你揀。
詳程請登入：
http://simplefitness123.blogspot.hk/2000/01/group-training.html
