有時與網友討論健身問題，我會建議佢地搵個好啲嘅 Gym，佢地話唔想洗錢；但係又會問我買乜嘢補充劑、健身奶粉嚟飲最有效，呢方面嘅錢又好捨得洗。
要有效減肥 / 改善身型，搵一個合適嘅 Gym真係好緊要。我認為一個好嘅 Gym 應有以下元素：
1. 地點方便，最好近屋企或公司
2. 器材唔洗花巧，有啞鈴、Barbell、Bench、Squat 及 Bench Press 用嘅鐵架（Rack）已經夠；不過器材數量及重量都要夠，如果成間 Gym 先得一張 Bench 或者一個 Rack 就唔係咁好
3. 人要 Okay，會員唔好太多 / 太雜，駐場教練唔好太煩
4. 開放時間啱自己，例如你每日八點先收工，咁可能要搵間收得夜啲嘅 Gym 先得
5. 月費，其實我覺得香港啲健身會藉費月係好合理，一千幾百，有冷氣有毛巾有電視有桑拿， 有啲仲有汽水咖啡奶茶俾你飲，仲想點？如果你一星期去到兩、三次，已經值回票價
「喺屋企舉吓水樽，做吓掌上壓、Situp 咪得囉」
除非你用辦公室飲水機嗰啲 19L 水樽，否則通常都唔夠重。條數好易計，1L 水等如 1公斤，就算俾你買到兩枝 3L 嘅礦泉水，每隻手都係得3 公斤，即 6.6 磅，呢個重量對住訓練胸肌、背肌、大腿等都係無所作為。一個未經訓練嘅人，有時連一吓正確姿勢嘅掌上壓、Situp都唔夠力做，又點樣靠佢地嚟減肥？喺健身室，器材重量由輕至重都有，等你可以按進度逐步加重，去達到健體目標。
補充劑
有啲朋友認為服用補充劑可以加快健身成效，但事實並唔係咁。如果平日飲食充足又健康，又何需補充？而且養份唔係越食得多越好，以蛋白質為例，攝取過多蛋白質對增加肌肉沒有幫助，反而會轉代為脂肪儲存喺身體肉，仲會傷腎。（關於蛋白質及健身奶粉，可以睇吓呢篇文章 http://simplefitness123.blogspot.hk/2014/10/blog-post_8.html）
結論
想減肥 / 健身用效啲，我寧願你將啲錢搵一個好啲嘅健身場地，而唔係用嚟買補充劑。 -完-
---------------------------------------------------------------------------------------------------------------
單人 / 小組健身課程 | 於私人健身室舉辦，有不同日子及類型課堂任你揀。
詳程請登入：http://simplefitness123.blogspot.hk/2000/01/group-training.html
