30 日真人測試：每日飲 3 公升水

一個月前喺網上睇到個 Post，話有位女士嘗試每日飲 3 升清水，持續 4 星期，睇吓身體有乜嘢變化。結果發現 4 星期後，皮膚比之前更有光澤，皺紋少咗，直情好似後生咗十年！



我將此 Post 轉載到 Fan Page，有網友認為只係 Photoshop 效果，有些認為係燈光、化粧做咗手腳。好奇心驅使下，我亦自發展開真人測試，為期 30 日，睇吓係咪真係咁神奇。

飲乜嘢水

煲滾嘅水喉水、蒸溜水、礦泉水，總之就係清水。

點飲法

唔會一次過飲好多。我係長期將樽水放喺視線範圍之內，一得閒就飲。通常日頭會飲多啲，臨瞓會少啲。

生活習慣嘅轉變

由於要飲夠每日 Quota，所以會比之前飲少咗其他飲品如 Zero、咖啡等。
會唔會飲水飲到肚漲？唔會。胃口冇減少到，一樣咁開胃。
小解會去多咗，可能每兩、三個鐘一次。（其實都好正常啫）

身體嘅轉變

之前睇過話飲得多水有助減肥，但飲咗一個月後，我嘅身型冇大改變，冇肥/瘦到。
小便係比之前淺色嘅。
感覺上係冇之前咁易眼瞓，精神咗。
皮膚呢？請睇睇以下嘅比較：



啲相我係用 iPad 自拍，每次影嘅位置、角度一樣，影嘅時間亦差唔多。相片只係 Crop 過，冇經過 Photoshop 或任何加工。我認為自己皮膚係比之前好咗，更有光澤，皺紋
亦少咗。

之前我冇刻意量度每日飲幾多清水，估計有 1 至 1.5升。突然飲多咗水，又唔會覺得辛苦，只係要成日提自己去飲水，但皮膚嘅轉變令我十分滿意，好過日日敷 Mask！加上飲水仲係免費，又唔係太煩，所以就算喺測試後，我仍然會 Keep 住呢個習慣。

---------------------------------------------------------------------------------------------------------------

單人 / 小組健身課程 | 於私人健身室舉辦，有不同日子及類型課堂任你揀。
詳程請登入：http://simplefitness123.blogspot.hk/2000/01/group-training.html