我見有啲朋友衡量一個教練或訓練流程有冇料到，係用「痛」嚟做指標：練完之後好痛 – 有料到；練完唔痛 – 廢嘅。
大家要明白一個邏輯：練完痛，唔代表有訓練效果；練完唔痛，唔代表冇訓練效果。痛同訓練效果，其實冇必然關係。
（如果睇完一次唔明，麻煩再睇多幾次，睇到明為止）
一個教練要個學生進步，係要好多心機，要了解個學生嘅體質、性格、喜好先可以做得好：但要操到個學生痛甚至嘔，就非常簡單。如果再有學生問我「做乜唔痛？」我會叫佢行埋一邊做 5 分鐘 Burpee 先好返嚟同我講嘢！（Full Speed，唔准停！:D）
「我每次練完 Squat、Deadlift 呢類動作之後，第二日大腿後肌會好痛，坐低、起身時特別痛… 請問是正常嗎？還是練習姿勢錯咗先會咁？另外，想問如果第二日肌肉痛，應該照去訓練定休息吓好？」
Squat 和 Deadlift 會用到大腿後肌，訓練後一至兩天肌肉酸痛*乃係正常反應。將痛嘅程度分成 0-10 分（10 分係最痛），如果你嘅痛係 5、6 分或以下，第二日可以照去訓練，但建議練習其他部份嘅肌肉，例如胸肌、手臂；但如果有 7、8 分或以上，第二日就最好去抖吓，同埋下次訓練時可以做返輕啲。
* 呢種痛簡稱 DOMS，Delayed Onset Muscle Soreness。想知更多可去 Facebook PM 問我
---------------------------------------------------------------------------------------------------------------
單人 / 小組健身課程 | 於私人健身室舉辦，有不同日子及類型課堂任你揀。
詳程請登入：http://simplefitness123.blogspot.hk/2000/01/group-training.html
