OL 減肥問題

今次應某報訪問，想我講吓 OL 肥胖問題。唔知佢幾時刋登，不如我 Po 出嚟等大家睇咗先了... 如果係我 Fan Page 嘅長期讀者，以下嘅嘢我諗你地都識背了，新讀者不妨睇吓！

1. OL 最易肥的部位，易肥的成因。

OL 最易肥嘅部位，莫過於大脾及臀部。第一係由於女性賀爾蒙，導致脂肪較易積聚喺下半身，第二係由於坐得太多。

Tel Aviv University 曾經對因癱瘓而需長期坐輪椅或卧床嘅病人進行研究，利用磁力共振掃描，發現長期受壓嘅身體部位，脂肪長得特別多。之後研究人員進行了另一個實驗，他們提取老鼠嘅脂肪細胞，分成兩組，一組會對細胞施加壓力，一組維持正常狀態，四星期後，研究人員發現施加壓力那一組嘅脂肪細胞數目，比另一組高出 50%。因而得出結論：長期坐著或卧床，受壓部位較易長出脂肪。

2. 針對相關部位的減肥運動建議

運動可以減肥，但唔可以針對減某部份嘅脂肪。即係：做 Sit Up 唔可以針對減肚腩、係咁擘開 /夾埋大脾亦無助局部減大脾內側嘅肥肉。我地可以做嘅，就係通過運動及改善生活習慣，降低整體嘅脂肪率，咁下半身肥胖問題先可得以改善。

運動方面，我建議一星期做 Gym 3 至 5 次，每次約 1 小時，專注喺負重訓練（即舉啞鈴、Barbell等），如果時間充裕，亦可以做吓帶氧運動。

「乜唔係帶氧先消脂咩？舉重咪會好大隻？」呢個係大眾對做 Gym 嘅誤解，合適嘅負重訓練，可以提升新陳代謝，令身體消耗更多卡路里，仲可以令手手腳腳線條靚啲。由於男女賀爾蒙有別，女士比男士更難練出肌肉，女士要「唔覺意」練到太大隻、太多肌肉，其實係冇乜可能。

飲食方面，食物嘅種類比熱量更重要，例如：100 卡路里嘅雪糕會比同樣100卡路里嘅雞肉致肥。多選擇天然食品、少食含添加糖嘅食品皆有助減肥；出街食飯，避免多汁或煎炸嘢食。飲食時間都要留意，一定要食早餐（即你瞓醒嘅第一餐），仲要大份啲，因為佢係有助提升新陳代謝，幫助消耗卡路里之餘，個人仲會精神啲！

圖片：電影 <<合約男女>> 劇照

---------------------------------------------------------------------------------------------------------------

單人 / 小組健身課程 | 於私人健身室舉辦，有不同日子及類型課堂任你揀。
詳程請登入：http://simplefitness123.blogspot.hk/2000/01/group-training.html