「我係女仔，165cm，65kg，從事體力勞動工作。有一位做教練嘅朋友，話我肌肉已經好繃緊，建議我只需拉筋，因為可以令線條好啲；而屋企人就覺得我嗰啲唔係肌肉，係肥。想問吓，我點知自己係肥定大隻？如果係大隻，訓練係咪帶氧運動為主？咁我大約要減到幾多 Kg？」
1. 拉筋可以改善柔軟度，但未必可以令線條好啲，同埋拉筋嘅減肥效果非常有限。
2. 憑相片估計，你係有肌肉，而肌肉上面亦有唔少脂肪，即係肌肉、脂肪都多。唔好以為多肌肉就唔可以多脂肪，佢地係可以並存嘅。
3. 令你睇落粗碌、大份嘅元凶，其實係脂肪，唔係肌肉；同埋肌肉較多，對減肥係較有利。所以訓練方面，負重運動始終係最緊要。如果你嘅訓練年資有返咁上下，可以考慮「高重量、少次數」嘅訓練方法，即係揀選較重嘅重量，每一組做嘅次數只係 5-6 吓，去到臨尾一、兩吓係有啲攰、辛苦嘅感覺。
4. 帶氧運動都可以做，如果體能許可，「短時間、高強度」（例如以最快速度划艇 500m）或「間歇訓練」模式（例如 Tabata）會較「長時間、低強度」訓練（例如緩步跑）有效。
5. 減肥從來都唔應該節食，而且你係從事體力勞動工作，一定要食嘢先有力，所以要留意嘅唔係「量」，而係「質」。平時開工食飯，盡量避開多汁、炸、油淋淋嘅嘢食；飲嘢方面，可能工作辛苦，都想飲返啲甜嘢，但如果想減肥，都可免則免了。含糖嘅嘢飲、啤酒、健康飲品（寶礦力、綠力之類）都最好唔好飲，走甜嘅凍檸茶、齋啡就冇問題。
6. 減肥係唔應該以磅數為目標，因為「重未必係肥，輕未必係瘦，肥瘦輕重根本係四件事。」（來自 <<董驃金句>> :D）。我認為你可以定期幫自己影全身照，用作比較身型。剩係著內衣褲更好，否則就唔能夠清楚睇到身型。一星期影一次，每次最好相同位置、燈光，包括正面、側面、背面，就可以睇到減肥進展。
---------------------------------------------------------------------------------------------------------------
單人 / 小組健身課程 | 於私人健身室舉辦，有不同日子及類型課堂任你揀。
詳程請登入：http://simplefitness123.blogspot.hk/2000/01/group-training.html
