唔好以為呼吸呢家野係人都識！初學者做 GYM 舉重時通常會不知不覺間閉氣。如果呼吸技巧唔好，好易會做到頭痛、血壓飆升、甚至暈低。所以今次會講吓做 GYM 呼吸嘅方法。
簡單方法
通常每一個動作都可分為「肌肉收縮」及「肌肉伸展」兩部份，最簡單嘅方法就係：「肌肉收縮」時呼氣，「肌肉伸展」時吸氣。以掌上壓為例，當慢慢屈曲手臂，將身體向下降時，主要發力嘅肌肉– 胸肌及三頭肌– 正在伸展，所以應該吸氣；當用力伸直手臂，將身體向上推時，胸肌及三頭肌正在收縮，所以應該呼氣。
係咪有啲難明？唔緊要，我俾多幾個例子，等大家可以跟住做：
Sit Up：瞓低時吸氣，坐起身時呼氣
用啞鈴練手瓜（二頭肌）：屈埋隻手時呼氣，伸直隻手時吸氣
用啞鈴練拜拜肉（三頭肌）：屈埋隻手時吸氣，伸直隻手時呼氣
踎低起身練大脾（蹲腿Squat）：踎低時吸氣，企起身時呼氣
平板支撐：雖然係定喺度唔洗郁，但應該 Keep 住慢慢呼吸
進階方法
做 GYM 並無「唯一」或「正確」的方法，呼吸亦一樣。如果已經能夠掌握基本健身技巧，可試試以下的進階方法：
多次呼吸：每一個動作的活動幅度都不一樣，所需時間亦有所不同。例如掌上壓每一吓需要上下郁動大概一尺，所 需時間較短；而蹲腿嘅動作較大，有兩至三尺，所需時間較長。如果做每一吓只呼吸一次，掌上壓問題不大，但蹲腿就可能會唔夠氣。所以我建議蹲腿時每一吓呼吸 數次，踎低及企起身時各呼吸 2 至 3 次不等。其他大動作（如 Deadlift）亦一樣道理。
短促呼吸：舉重時避免深呼吸，否則會好快氣喘。試試採用淺而短促嘅方法，每一吓呼吸約 1 秒。
如果能夠純熟運用以上兩個進階技巧，包你可以做多幾吓，唔會做到「紅都面晒」！
---------------------------------------------------------------------------------------------------------------
單人 / 小組健身課程 | 於私人健身室舉辦，有不同日子及類型課堂任你揀。
詳程請登入：http://simplefitness123.blogspot.hk/2000/01/group-training.html
