「我肥得嚟啲肉好實。係咪因為脂肪密度高？定係肌肉嚟？呢一類身型係咪難減啲？」
女仔肥得嚟都有不同嘅肥法，有啲肥得嚟係「泡」嘅，有啲就「實的的」；有啲剩係個肚肥，手腳都幼，有啲就全身都漲卜卜。
肥得嚟實嘅，唔係脂肪密度高，而係肥得嚟都有肌肉。脂肪喺面，肌肉喺底，所以睇落並冇線條。咁點解會有呢一種身型？依我嘅經驗，有啲係因為遺傳，有啲係因為之前有運動習慣，例如細個係泳隊或打開波，所以肌肉會比平常人多一啲，但之後因為工作或其他理由疏於運動，所以脂肪越嚟越多，就形成「又肥又有肌肉」嘅身型。
係咪難減啲嘅？我又唔認為。方法都係要去做 Gym 同埋控制飲食。可能你會話「嘩我已經有肌肉架啦喎，仲去做 Gym？」第一，雖然話又肥又有肌肉，但肥膏始終佔多數；第二，肌肉多啲，係對消脂有利。咁係咪「消脂就要舉輕啲、次數要多」？呢個係錯嘅。初初做 Gym 時，每組嘅次數都可以喺大約 10 至 15 次呢個 Range 裡面。
飲食方面要點呢？唔係要你節食，每餐剩係食半個西柚之類，但要睇吓平時嘅選擇係咪有問題。例如食粉麵，你會揀去食沙爹牛出前一丁定係魚蛋米？食飯係咪成日揀多汁、炒飯類或焗飯類？進食時間都要考慮，食晚飯冇耐就去瞓，或者有食宵夜習慣？
如果想知道自己嘅飲食習慣有冇問題，可以幫自己寫幾日 Food Diary，再搵相熟嘅健身教練俾啲意見。
---------------------------------------------------------------------------------------------------------------
單人 / 小組健身課程 | 於私人健身室舉辦，有不同日子及類型課堂任你揀。
詳程請登入：http://simplefitness123.blogspot.hk/2000/01/group-training.html
