聖誕 / 新年健美飲食策略

（圖片來源：http://www.kijashi.com/luxury-christmas-dinner-table-place-settings/）

又到咗每年最「邪惡」嘅時間！聖誕節、新年期間，日日暴飲暴食，體重隨時爆升三五七磅！點樣可以享受佳節美食之餘又肥少啲？快啲睇吓以下 5 點。

1. 食早餐

不論聖誕、新年或平日，食一份豐富、夠營養嘅早餐就係 Keep Fit 成功嘅開始。食夠早餐，除咗可以提高新陳代謝率（新陳代謝率 ⬆，消脂速度 ⬆），仲可以令你去到夜晚都唔會太肚餓，可以較理智咁去食嘢。

2. 帶水出街

同朋友出街，加上天寒地凍，特別容易肚餓或口痕，令食立雜嘢嘅意慾增加。帶 / 買定枝水放喺手袋，不時拎出嚟飲吓，可以降低食慾。因為身體有時會將「口渴」嘅訊號誤判為「肚餓」，你以為自己肚餓咩？其實只係飲唔夠水咋。

3. 食飯時

大時大節，當然唔會叫你食「拳頭咁大舊飯、手板咁大塊肉」啦。只係當你去食「蒲飛」或叫到一枱都係餸，每次夾嘢食時，試吓有半碟係較健康嘅菜式，如蔬菜或冇咁多汁同肥膏嘅肉類，另外半碟就任得你食。我覺得係較合理嘅做法。

4. 甜品

如果可以嘅話... 盡量以沙律代替甜品；就算唔得，都盡量食少啲。食一件甜品，點都好過食兩件... 食甜嘢真係好肥的。

5. 食 / 玩得開心啲！

食完一餐，體重隨時會重幾磅，原因唔係多咗幾磅脂肪，而係食物含有水份，食咗落肚令身體水份增加。水係好「重」的。（應該係話：水嘅密度好高）一樽 500 毫升嘅水已經有 1.1 磅！

夜晚返到屋企，唔洗上磅，唔好怪責自己，更加唔好賴你啲 Friend。聖誕 / 新年一年一次，請好好享受，過咗先慢慢減啦！

---------------------------------------------------------------------------------------------------------------

單人 / 小組健身課程 | 於私人健身室舉辦，有不同日子及類型課堂任你揀。
詳程請登入：http://simplefitness123.blogspot.hk/2000/01/group-training.html