「如果女士去跑步，有什麼拉筋運動可以放鬆及提防長出肌肉令小腿變粗？ 謝謝。」
跑步後的數小時，小腿肌肉的確會比平時繃緊或漲大，原因係肌肉正處於充血狀態：血管擴張，為肌肉提供更多氧氣及養份，並帶走代謝廢物。然而，這效果只係暫時性，並非一課訓練後立刻生長肌肉所致。按摩及伸展（即係「拉筋」）小腿肌肉有助舒緩情況，方法可參考此短片：https://youtu.be/7Rm-oxnurHw 。
至於長期跑步點解會令小腿變粗？這正是跑步嘅訓練結果之一：跑步需要運用小腿肌肉，如果運動強度或份量超出平日生活嘅水平，小腿肌肉就會變大變強，令身體足夠應付跑步呢項活動。這正是運動理論：SAID Principle。強烈建議大家上網睇吓，明白呢個原理，咁好多運動嘅問題你都會諗到答案。
咁點先唔會令小腿變粗，或令小腿肌肉縮細返？好簡單，只要唔好跑咁多、跑咁長距離就可以，訓練少咗，肌肉自然相應變弱變細。另一個較為極端嘅例子就係打石膏：如果咁唔好彩，有隻手要打石膏，到你拆石膏嗰陣，你會發覺隻手臂會幼咗好多，原因就係你有一段時間冇用過佢，活動量大大降低，隻手會適應新嘅活動量，而令多餘嘅手臂肌肉萎縮，因而變幼。
但係，小腿粗，係咪真係因為肌肉太大？依我嘅教學經驗，唔少新學員同我聯絡時，都話自己小腿肌肉太大，想減細啲。但到我上堂見到佢真人，粗嘅原因多數都係脂肪太多。
---------------------------------------------------------------------------------------------------------------
單人 / 小組健身課程 | 於私人健身室舉辦，有不同日子及類型課堂任你揀。
詳程請登入：http://simplefitness123.blogspot.hk/2000/01/group-training.html
