去到健身室，最多人做嘅嘢就係舉重同帶氧運動，究竟邊樣做先，Keep Fit 嘅效果先至最好？（其實撳電話先係最多，不過係唔應該嘅 :) ）
早幾日有位新同學問我，係咪應該先做半小時至一小時帶氧運動，等個人出晒汗先去舉重？呢個係大錯特錯嘅。有一個訓練嘅原則大家要記住，就係「強度越高嘅訓練，次序越前」。
何謂強度高？動作嘅強度越高，夠力重複去做嘅次數或時間就越短。例如負重蹲腿練習，每組做大約 10-15 次，時間只係約 1 分鐘；而跑跑步機，閒閒地可以跑 20 分鐘以上，所以蹲腿嘅強度比跑機高。
咁點解強度高嘅訓練要先做？進行高強度嘅訓練，係極依賴肌肉裡嘅糖原（Glycogen）去產生能量。而糖原嘅儲備係有限嘅，如果先做帶氧運動，會將糖原用晒，之後嘅舉重表現就會較差 – 次數冇咁多、重量冇咁高，甚至較易發生意外。
如果想有效 Keep Fit 減肥，應該先舉重，之後先去做帶氧運動。
跑機 Warm Up 又計唔計？如果只係慢跑幾分鐘，等肌肉溫度高啲先舉重，呢個又唔算係帶氧運動。不過講到熱身，我認為動態熱身運動會比純粹跑機有效，方法可以參考：https://youtu.be/EXskqZykAeM 。
---------------------------------------------------------------------------------------------------------------
單人 / 小組健身課程 | 於私人健身室舉辦，有不同日子及類型課堂任你揀。
詳程請登入：http://simplefitness123.blogspot.hk/2000/01/group-training.html
