媽媽產後健身問題

多謝各位對本人嘅信任，但健身教練唔係萬能，有啲嘢教練係答唔到你的。以下係我同一位早幾個月前剖腹生產嘅媽媽嘅對話。

媽媽：我生完BB差不多 3 個月，開刀嘅。而家可以開始減肥未？

教練：HI。呢個問題要問返你嘅醫生。

媽媽：我醫生話而家可以做輕量運動，唔劇烈就得，劇烈要等半年。

教練：何謂輕量與劇烈？你要問清楚醫生，唔好亂嚟。

媽媽：佢只係話傷口唔痛就得。我諗負重訓練都 Okay 卦？我見到你話最有效減肥方法係重訓。

教練：點解唔直接問醫生呢？

媽媽：問過啦，佢冇答我，佢只係話傷口唔痛就得。

教練：連負責嘅醫生都唔敢/唔肯答嘅問題，你又點可以隔住 Facebook 問個健身教練呢？我話得你都唔好信啦。

媽媽：佢唔係唔肯答，佢係對自己手勢好有信心啫。佢覺得做乜都得，唔痛就得。但我做Plank時個肚有少少痛囉。

教練：「做乜都得，唔痛就得」，最慘可能一痛個傷口已經爆返開。

媽媽：又唔會，埋左口啦。

教練：埋咗口，好返晒就唔會做 Plank 會痛啦。

媽媽：我諗可能太耐無用個舊肉？無晒力卦。

教練：咁係攰，唔係痛。
 

媽媽：練其他位先，唔練肚位就無問題啦？我想全身瘦咋。

教練：呢個問題，就係要問醫生。佢答一句「可以健身」就無問題。

媽媽：Okay。


健身教練嘅專業範圍就只係健身。治理傷患、醫病、皮膚或其他健康問題，最好請教返醫生或其他專業人士。 

---------------------------------------------------------------------------------------------------------------
單人 / 小組健身課程 | 於私人健身室舉辦，有不同日子及類型課堂任你揀。
詳程請登入：http://simplefitness123.blogspot.hk/2000/01/group-training.html