Keep Fit 減肥嘅合理期望

女網友問「我想問點樣能夠用幾個月由154磅減至140磅？我想用d唔太辛苦又見效的方法，又唔會反彈。」（問題原文，未經修改）

今次揀呢條問題，並唔係要取笑呢位網友。係人都想付出最少時間、犧牲最少，但係又減到肥兼唔會反彈。如果佢之前沒有運動或減肥經驗，咁樣問都唔出奇嘅。

市面上的確係有啲代餐，Keep 住每日飲，又食好少野，係可以喺幾個月瘦十幾磅。但個問題係身體會冇晒力，有時會見頭暈，而且一停止使用代餐，身型會快速反彈，肥過之前。我都有唔少學生試過，發覺出事先搵我上堂。

的確有辦法係有效減十幾磅，又唔會快速反彈，就係改變你嘅生活習慣，包括要養成健身嘅習慣，調節飲食嘅份量，食物嘅選擇等。以我教學生嘅經驗，通常兩三個月後會開始見到效果，記住，係開始，並唔係兩三個月可以由加大碼變中碼。而過程辛唔辛苦？當然有啲辛苦啦，同埋要有耐性。

咁如果停止健身，又食返啲肥野，身型會唔會回復原狀？梗係會啦，但唔會係快速反彈。

可能遲啲科學有大突破，可以用一啲好簡單嘅方法就減到肥兼冇副作用，而且價錢係大眾負擔得到（我的確相信會有呢一日嘅來臨，而到時健身行業會隨之式微）但暫時仲未出現，大家唯有繼續努力。

---------------------------------------------------------------------------------------------------------------

單人 / 小組健身課程 | 於私人健身室舉辦，有不同日子及類型課堂任你揀。
詳程請登入：http://simplefitness123.blogspot.hk/2000/01/group-training.html